កុមារា ឡូត ធីមមុត អាយុ ៦ឆ្នាំ ជាសិស្សនៃសាលាបឋមសិក្សាកោះកាង ក្រុងខេមរភូមិន្ទ ខេត្តកោះកុង ត្រូវបានរកឃើញថាមានជំងឺដុំខ្លាញ់ក្រោមចង្កា (Lipomatous Neoplasm)។ ក្រោមការចង្អុលបង្ហាញដ៏ខ្ពង់ខ្ពស់ ក្រុមគ្រូពេទ្យជំនាញនៃសមាគម TYDA ប្រចាំមន្ទីរពេទ្យកុមារជាតិ បានអនុវត្តការវះកាត់ជូនកុមារាប្រកបដោយជោគជ័យ និងសុវត្ថិភាពជាទីបំផុត។
គួររំលឹកផងដែរថា រាល់ការចំណាយលើការព្យាបាល ការវះកាត់ ថ្លៃអាហារហូបចុកប្រចាំថ្ងៃ រួមទាំងការធ្វើដំណើរពីខេត្តមកកាន់រាជធានីភ្នំពេញ គឺត្រូវបាន សម្តេចធិបតី និង លោកជំទាវបណ្ឌិត ផ្ដល់ការឧបត្ថម្ភ និងទំនុកបម្រុងទាំងស្រុង។
ស្ថិតក្នុងក្ដីរំភើបរីករាយឥតឧបមា អាណាព្យាបាល និងសាមីខ្លួនកុមារាផ្ទាល់ បានសម្ដែងនូវការដឹងគុណយ៉ាងជ្រាលជ្រៅបំផុត និងគោរពអរគុណដល់ សម្តេចធិបតី និង លោកជំទាវបណ្ឌិត ដែលជានិច្ចកាលតែងតែផ្ដល់នូវក្ដីសង្ឃឹម និងការសង្គ្រោះដល់ប្រជាពលរដ្ឋដែលមានជីវភាពខ្វះខាត ជាពិសេសការយកចិត្តទុកដាក់លើអនាគតរបស់កុមារកម្ពុជា។
