យោងតាមប្រភពពីកិច្ចប្រជុំបិទទ្វារមួយជាមួយសមាជិកព្រឹទ្ធសភាអាមេរិក កាលពីថ្ងៃអង្គារកន្លងទៅ ក្រុមមន្ត្រីរដ្ឋបាលបានបញ្ជាក់ពីទំហំចំណាយដ៏មហិមានេះ ដែលក្នុងនោះរួមមាន៖
ចំណាយលើសព្វាវុធ៖ ប្រហែល ៥.៦ ពាន់លានដុល្លារ ត្រូវបានប្រើប្រាស់ក្នុងរយៈពេលតែ ២ ថ្ងៃដំបូងប៉ុណ្ណោះ។
ស្ថានភាពសង្រ្គាម៖ ការវាយតម្លៃនេះកើតឡើងបន្ទាប់ពីសហរដ្ឋអាមេរិក និងអ៊ីស្រាអែល បានបើកការវាយប្រហាររួមគ្នាលើអ៊ីរ៉ង់ កាលពីថ្ងៃទី២៨ ខែកុម្ភៈ កន្លងទៅ។
តួលេខ ១១.៣ ពាន់លានដុល្លារនេះ ត្រូវបានគេជឿថាគ្រាន់តែជាការចំណាយមួយផ្នែកប៉ុណ្ណោះ ហើយមិនទាន់រាប់បញ្ចូលការចំណាយសរុបទាំងស្រុងនៃសង្រ្គាមនោះឡើយ។ ការបង្ហាញទិន្នន័យនេះ ធ្វើឡើងបន្ទាប់ពីមានការទាមទារយ៉ាងខ្លាំងក្លាពីសំណាក់តំណាងរាស្ត្រអាមេរិក ដើម្បីដឹងពីតម្លាភាពនៃកញ្ចប់ថវិកាជាតិ។
ជាមួយគ្នានេះដែរ ក្រុមមន្ត្រីសភាបានបង្ហើបថា សេតវិមានទំនងជានឹងដាក់សំណើទៅកាន់សភាអាមេរិកក្នុងពេលឆាប់ៗខាងមុខ ដើម្បីស្នើសុំកញ្ចប់ថវិកាបន្ថែមសម្រាប់ប្រតិបត្តិការសង្រ្គាម។ ប្រភពខ្លះបានប៉ាន់ប្រមាណថា ចំនួនទឹកប្រាក់ដែលសេតវិមានអាចនឹងស្នើសុំ មានទំហំចន្លោះពី ៣០ ទៅ ៥០ ពាន់លានដុល្លារ។
គួរបញ្ជាក់ថា ភាពតានតឹងរវាងវ៉ាស៊ីនតោន និងតេអេរ៉ង់ បានឈានដល់ចំណុចផ្ទុះអាវុធកាលពីចុងខែកុម្ភៈ ដែលបង្កឱ្យមានការព្រួយបារម្ភជាខ្លាំងដល់សន្តិសុខក្នុងតំបន់មជ្ឈិមបូព៌ា និងសេដ្ឋកិច្ចពិភពលោក៕
(ប្រភព៖ Reuters)
